Sot, INSTAT mori pjesë në takimin zyrtar hapës të projektit “Statistikat shqiptare në përputhje me legjislacionin kombëtar dhe kërkesat e BE-së”, një iniciativë dhe bashkëpunim i rëndësishëm me Ambasadën Suedeze në Shqipëri dhe zyrën statistikore të Suedisë. Ky bashkëpunim synon të forcojë Sistemin Kombëtar Statistikor dhe avancimin e progresit të Shqipërisë drejt integrimit evropian. Takimi u zhvillua me pjesëmarrjen e përfaqësuesve të lartë, partnerëve dhe aktorëve të rëndësishëm të komunitetit statistikor kombëtar dhe ndërkombëtar.

Fjalën hyrëse e mbajti Sekretari i Përgjithshëm i INSTAT, z. Alban Çela, për të vijuar me fjalët përshëndetëse nga z. Niklas Ström, Ambasador i Suedisë në Shqipëri, znj. Eva-Lo Ighe, Drejtore e Përgjithshme e Statistikave të Suedisë, znj. Blerta Rama, Zv. Ministre e Ministrisë së Ekonomisë, Kulturës dhe Inovacionit.

Takimi vazhdoi me prezantimet e z. Maldi Dema, Drejtor i Drejtorisë së Koordinimit të SKS-së, Përafrimit dhe Projekteve, lidhur me punën që ka bërë INSTAT sa i takon zhvillimit të Sistemit Statistikor Kombëtar dhe sfidat që nap resin përpara.

Po ashtu znj. Birgitta Mannfelt, Këshilltare Afatgjatë Rezidente në Shqipëri, solli një prezantim përmbledhës të projektit dhe të bashkëpunimit me INSTAT.

Gjithashtu, sot u firmos Memorandumi i Mirëkuptimit ndërmjet INSTAT dhe Statistikave Suedeze për zbatimin e këtij projekti të përbashkët, me synim rritjen e kapaciteteve të INSTAT për përmbushjen e detyrave të tij si dhe kërkesave të acquis të BE-së në fushën e statistikave.

Përafrimi i statistikave zyrtare shqiptare me acquis të BE-së mbetet një prioritet për INSTAT. Gjatë viteve të fundit është arritur përparim i dukshëm në përmirësimin e cilësisë së të dhënave, forcimin e metodologjisë, dixhitalizimin e proceseve të prodhimit dhe rritjen e bashkëpunimit brenda Sistemit Statistikor Kombëtar. Kjo fazë e re bashkëpunimi me Statistikën e Suedisë do të mbështesë më tej Shqipërinë në përmbushjen e standardeve të Sistemit Evropian Statistikor, duke siguruar krahasueshmëri, besueshmëri dhe transparencë të statistikave zyrtare.

INSTAT falënderon të gjithë partnerët dhe shprehet i gatshëm për një bashkëpunim të suksesshëm gjatë gjithë zbatimit të projektit.