REPUBLIKA E SHQIPERISE

KUVENDI

LIGJ

Nr. 8669 date 26.10.2000

PER REGJISTRIMIN E PERGJITHSHEM TE POPULLSISE DHE BANESAVE

Në mbështetje të neneve 78 dhe 83 të Kushtetutës, me propozim të Këshillit të Ministrave,

K U V E N D I

I REPUBLIKES SE SHQIPERISE

V E N D O S I:

KREU I

DISPOZITA TE PERGJITHESHME

Neni 1

Qëllimi i regjistrimit

1. Regjistrimi synon që t’u ofrojë Kuvendit, Qeverisë, njësive të qeverisjes vendore, organizatave ekonomike, shkencore dhe kulturore, si dhe gjithë shoqërisë civile të dhëna të besueshme statistikore, të nevojshme për planifikimin dhe realizimin e politikave të përgjithshme të zhvillimit, për analizat private dhe publike të vendim-marrjes, për kërkime shkencore dhe në përgjithësi për përmirësimin e njohjes dhe të të kuptuarit nga shtetasit të realitetit demografik, ekonomik dhe shoqëror të vendit.

2. Regjistrimi ofron të dhëna për:

a. Shifrën dhe shpërndarjen gjeografike të popullsisë residente ( banuese);

b. Strukturën demografike dhe karakteristikat kryesore të popullsisë;

c. Numrin, shpërndarjen gjeografike dhe strukturën e banesave dhe ndërtesave të përdorura për qëllime banimi;

d. Kushtet e strehimit të popullsisë.

3. Regjistrimi synon të ofrojë të dhëna të besueshme, të cilat do t’u mundësonin organeve përgjegjëse, ligjore hartimin e listave zgjedhore dhe të pasqyronin të rejat më të fundit në regjistrat civilë.

Neni 2

Objekti i ligjit

Ky ligj rregullon organizimin dhe realizimin e regjistrimit të përgjithshëm të popullsisë dhe banesave në territorin e Republikës së Shqipërisë.

Neni 3

Përkufizime

Në kuptim të këtij ligji termat e mëposhtme do të kuptohen kështu:

a) me “Popullsi residente” kuptohet popullsia e përbërë nga grupi i individëve, të cilët ditën e regjistrimit ndodhen në territorin e Republikës si dhe ata të cilët janë larguar për një periudhë prej më pak se një vit.

b) Me “Banesë” kuptohet një ose më shume mjedise, të caktuara për përdorim banimi, që kanë një hyrje të pavarur në rruge, kat, oborr, tarracë dhe që në çastin e regjistrimit është ose janë të banuara ose të përcaktuara për t’u banuar nga një person ose një grup personash.

Termat e tjera që do të përdoren në procesin e regjistrimit do të përcaktohen në librin e udhëzimeve.

Neni 4

Detyrimi për tu përgjigjur

Të gjithë shtetasit shqiptarë dhe të huaj, me përjashtim të personelit diplomatik të akredituar në Shqipëri, të cilët në çastin e regjistrimit ndodhen brenda territorit të Republikës, janë të detyruar të japin saktësisht të dhënat e kërkuara për regjistrimin për veten dhe për të afërmit e tyre.

Neni 5

Institucioni i regjistrimit

Regjistrimi organizohet dhe zbatohet nga Instituti i Statistikave (INSTAT), nën mbikqyrjen e Komisionit Qëndror të Regjistrimit dhe me mbështetjen e komisioneve të regjistrimit në prefektura dhe zyrave të regjistrimit në komuna dhe bashki.

Kompetencat dhe marrëdhëniet e këtyre organeve përcaktohen në këtë ligj.

Neni 6

Data e regjistrimit dhe periudha e mbledhjes së të dhënave

Çasti i regjistrimit është mesnata e 31 marsit 2001. Mbledhja e të dhënave do të kryhet brenda muajit prill 2001.

Neni 7

Shtrirja e regjistrimit

1. Regjistrimi mbulon të gjitha zonat urbane dhe rurale, pra kryhet në çdo qytet dhe fshat të territorit të Republikës.

2. Ai përfshin popullsinë banuese si dhe të gjitha objektet brenda territorit të Republikës që përdoren për banim, pavarësisht në se ato janë pronë e luajtëshme ose e paluajtëshme.

Neni 8

Të dhënat e mbledhura

Të dhënat e mbledhura gjatë regjistrimit ndahen në dy kategori:

a. të dhëna individuale identifikuese të personave që janë emri, atësia, mbiemri, adresa dhe identifikuesit topografikë

b. të dhënat strukturore mbi karakteristikat e ndërtesave, banesave, grupeve të personave që jetojnë së bashku si dhe individëve, të kërkuara për qëllime vetëm statistikore, në përputhje me udhezimet ndërkombëtare.

Neni 9

Mbrojtja e të dhënave dhe sekreti profesional

Të dhënat e mbledhura gjatë regjistrimit mbrohen në përputhje me legjislacionin në fuqi. INSTAT dhe Ministria e Pushtetit Lokal marrin masat e mëposhtme:

a. Personeli i cili nëpërmjet angazhimit në regjistrim, përpunimit të listave zgjedhore dhe pasurimit me të dhënat e fundit të regjistrave civilë, ka njohuri për të dhëna vetjake, i nënshtrohen detyrimit për ruajtjen e sekretit profesional në përputhje me Ligjin Nr. 7687 Date 16.03.1993 “Për Statistikën” dhe Ligjit Nr. 8517 Date 22.07.1999 “Për Mbrojtjen e të dhënave personale”. Asnjë autoritet publik nuk mund ta shmangë këtë detyrim në asnjë rrethanë. Shkelja e këtij detyrimi mbetet e dënueshme edhe pas përfundimit të marrëdhënieve të punës me programin e regjistrimit.

b. INSTAT dhe Ministria e Pushtetit Lokal marrin masat e duhura teknike, organizative dhe të sigurimit për të parandaluar çdo hyrje të paautorizuar në vendet dhe instalimet ku ruhen të dhënat e regjistrimit, si dhe për të parandaluar përpunimin e paautorizuar të këtyre të dhënave.

c. Të dhënat e mbledhura për qëllime statistikore, pas kontrolleve teknike për saktësinë dhe qëndrueshmërinë e tyre të kryer nga personeli i regjistrimit, bëhen anonime nëpërmjet fshirjes së të dhënave identifikuese individuale nga dosjet elektronike.

d. Të dhënat individuale anonime mund t’i komunikohen një pale të tretë të autorizuar vetëm për veprimtari që janë në përputhje me qëllimin statistikor të regjistrimit. Marrësi i të dhënave i nënshtrohet detyrimit të sekretit profesional, merr masat e përshtashme të sigurimit dhe garanton që çdo botim i rezultateve statistikore të jetë në përputhje me dispozitat e këtij ligji.

Neni 10

Rezultatet e regjistrimit

Rezultatet statistikore të regjistrimit janë një pasuri e përbashkët e gjithë shoqërisë shqiptare. Ato jepen në kushtet e mëposhtme:

a. INSTAT paraqet dhe boton rezultatet e përkohëshme dhe ato përfundimtare të regjistrimit mbi baza shkencore dhe profesionale.

b. Rezultatet statistikore në nivel vendi ose njësie të qeverisjes vendore janë të publikueshme pa kufizime. Megjithatë, ato duhet të paraqiten në një formë që përjashton çdo mundësi për identifikimin e individëve të veçantë.

KREU II

PERBERJA, PERGJEGJESITE DHE MARREDHENIET E

ORGANEVE TE NGARKUARA ME REGJISTRIMIN

Neni 11

Komisioni Qëndror i Regjistrimit

Komisioni Qëndror i Regjistrimit përbëhet nga 23 anëtarë si më poshtë:

a. Zëvendës Kryeministri dhe Minister i Punes dhe Çeshtjeve Sociale Kryetar

b. Ministri i Financave Anëtar

c. Ministri i Pushtetit Lokal “

d. Ministri i Bashkëpunimit Ekonomik dhe Tregtisë “

e. Ministri i Drejtësisë “

f. Ministri i Arsimit dhe Shkencës “

g. Ministri i Punëve Publike “

h. Minstri i Transporteve “

i. Ministri i Shëndetësisë “

j. Ministri i Rendit Publik “

k. Ministri i Mbrojtjes “

l. Ministri i Punëve të Jashtme “

m. Kryetari i Akademisë së Shkencave “

n. Drejtori i Përgjithshëm i INSTAT “

o. Kryeregjistruesi i Zyrës së Regjistrimit të Pasurive të Paluajtëshme “

p. Drejtori i Përgjithshëm i Institutit të Sigurimeve Shoqërore “

q. Dekani i Fakultetit Ekonomik në Universitetin e Tiranës “

r. Dekani i Fakultetit të Shkencave Sociale në Universitetin e Tiranës “

s. Përgjegjësi i Sektorit të Demografisë (INSTAT) “

t. Shefi i Departamentit të Statistikave, Informatikës dhe Matematikës

së Aplikuar në Fakultetin Ekonomik në Universitetin e Tiranës “

u. Tre specialistë në fushat e ekonomisë, informatikës dhe demografisë “

Neni 12

Përgjegjësitë e Komisionit Qëndror të regjistrimit

Komisioni Qëndror i Regjistrimit ka këto përgjegjësi:

a. Harton dhe miraton rregulloren e Komisionit Qëndor të Regjistrimit

b. Mbikqyr përgatitjen dhe zbatimin e regjistrimit dhe udhëzon INSTAT-in për të dhënat statistikore që priten nga institucionet publike, rrethet shkencore dhe shoqëria civile.

c. Garanton bashkërendimin e punës ndërmjet ministrive dhe institucioneve qëndrore për regjistrimin dhe mbështetjen e organizatave shkencore.

ç. I propozon Këshillit të Ministrave përbërjen e komisioneve të regjistrimit në

prefektura si edhe të zyrave të regjistrimit në bashki dhe komuna si dhe përcakton

detyrat e tyre.

Neni 13

Instituti i Statistikave

Instituti i Statistikave (INSTAT) ka këto përgjegjësi:

a. Harton programin e punës, përcakton metodologjinë, harton pyetësorin, përzgjedh mjetet teknike dhe programet kompjuterike të përshtatshme, nxjerr udhëzimet e nevojshme dhe kryen përgatitjen dhe zbatimin e regjistrimit mbi baza profesionale dhe shkencore të pavarura.

b. Menaxhon burimet njerëzore dhe financiare të orfuara për regjistrimin dhe u raporton Komisionit Qëndror të Regjistrimit dhe donatorëve ndërkombëtarë mbi përdorimin e këtyre burimeve.

c. Informon autoritetet dhe organet qeveritare përkatëse mbi hapat që duhen marrë për regjistrimin, zhvillon fushatën e njoftimit publik dhe raporton në Komisionin Qëndror për zhvillimin e operacioneve të regjistrimit.

ç. Harton termat e referencës dhe udhëzimet e trainimit që duhet të zbatohen nga komisionet

e regjistrimit në prefekturë dhe zyrat e regjistrimit në bashki dhe komuna për

përzgjedhjen dhe trainimin e personelit të regjistrimit. Drejton punën në terren për

realizimin e qëllimeve të këtij ligji dhe merr të gjitha masat e nevojshme për kryerjen

në kohë dhe me korrektësi të regjistrimit, në bashkëpunim me organet e regjistrimit në

njësitë e qeverisjes vendore.

d. Paraqet dhe boton rezultatet paraprake dhe përfundimtare të regjistrimit.

Neni 14

Komisioni i Regjistrimit në Prefekturë

Këshilli i Ministrave me propozim të Komisionit Qëndror të Regjistrimit cakton përbërjen e Komisioneve të Regjistrimit që ngrihen në çdo prefekturë.

Ky Komision ka përgjegjësitë e mëposhtme:

a. Në zbatim të udhëzimeve dhe përcaktimeve të INSTAT, organizon punën përgatitore për regjistrimin brenda territorit të prefekturës, përzgjedh personelin e regjistrimit, trajnon kontrollorët dhe merr të gjitha masat e nevojshme për zbatimin në kohë dhe me korrektësi të procesit të regjistrimit.

b. U jep asistencë teknike zyrave të regjistrimit në bashkitë dhe komunat që janë brenda territorit të prefekturës dhe bën kontrolle periodike në këto zyra për zhvillimin e procesit të regjistrimit.

c. Raporton çdo javë në INSTAT për zhvillimin e veprimeve të regjistrimit në prefekturë, ndërsa gjatë muajit të regjistrimit raporton çdo ditë.

ç. Në bashkëpunim me INSTAT dhe me zyrat e regjistrimit në bashki dhe komunë organizon

punën për marrjen dhe dërgimin e pyetësorëve të regjistrimit dhe materialeve shoqëruese

në komisionet dhe zyrat e regjistrimit në bashki dhe komunë.

Neni 15

Zyrat e regjistrimit në bashki dhe komuna

Këshilli i Ministrave me propozim të Komisionit Qëndror të Regjistrimit cakton përbërjen e një Zyre Regjistrimi në çdo komunë dhe bashki. Kjo Zyrë, ka detyrat e mëposhtme:

a. Në zbatim të udhëzimeve dhe orientimeve të INSTAT, merr të gjitha masat e nevojshme për të siguruar zhvillimin normal të veprimeve të regjistrimit brenda territorit të bashkisë dhe komunës dhe u jep të dhëna dhe asistencë personelit të regjistrimit në qytete dhe fshatra.

b. Përzgjedh dhe trajnon anketuesit dhe kontrollon kryerjen e detyrave prej tyre.

c. Raporton çdo javë Komisionit të Regjistrimit në Prefekture për zhvillimin e procesit të regjistrimit brenda territorit të bashkisë ose komunës, ndërsa gjatë muajit të regjistrimit raporton çdo ditë.

ç. Merr masat e duhura për të siguruar pranimin në gjendje të mirë të materialeve të

regjistrimit në bashki ose komunë, depozitimin e sigurtë të këtyre materialeve dhe

dorëzimin në kohë të tyre në Komisionin e Regjistrimit të Prefekturës.

KREU III

PROCEDURAT E REGJISTRIMIT

Neni 16

Publiciteti

Qëllimet dhe procedurat e regjistrimit, si edhe detyrimet juridike lidhur me të, do të bëhen publike nëpërmjet mediave dhe një fushate të gjerë informimesh, të drejtuara nga INSTAT. Publiciteti do të fillojë të paktën katër javë para fillimit të regjistrimit.

Neni 17

Zyra Qëndrore e Regjistrimit të Pasurive të Paluajtshme

Zyra Qëndrore e Regjistrimit të Pasurive të Paluajtshme i jep INSTAT-it në kohën e duhur hartat treguese të vendodhjes së pasurive të paluajtshme.

Neni 18

Personeli i regjistrimit

1. Personeli i regjistrimit përbëhet nga:

a. anketuesit, të cilët, të pajisur me një shenjë dalluese zyrtare, shkojnë në çdo vendbanim për të intervistuar banorët dhe për të plotësuar me saktësi pyetësorin;

b. kontrollorët, të cilët mbështesin dhe kontrollojnë punën e disa anketuesve;

c. mbikëqyrësit, të cilët mbështesin dhe kontrollojnë punën e disa kontrollorëve;

ç. operatorët, të cilët fusin të dhënat e pyetësorëve në sistemet e kompjuterizuara;

d. personeli drejtues, që organizon dhe drejton përgatitjen, njoftimin, logjistikën dhe administrimin e regjistrimit;

dh. statisticienët, demografët dhe personel tjetër, të cilët përpunojnë të dhënat, analizojnë

përmbledhëset dhe nxjerrin rezultatet statistikore të regjistrimit.

2. INSTAT përcakton kriteret për përzgjedhjen, rekrutimin dhe trainimin e personelit të regjistrimit, të cilët emërohen si më poshtë:

a. emërimi i anketuesve bëhet nga zyra e regjistrimit në bashki ose komunë;

b. emërimi i kontrollorëve bëhet nga Komisioni i Regjistrimit të Prefekturës me propozimin e Zyrës së Regjistrimit në bashki ose komunë;

c. emërimi i mbikëqyrësve bëhet nga Komisionet e Regjistrimit të Prefekturave;

d. emërimi i operatorëve, personelit drejtues dhe ekspertëve shkencorë bëhet nga INSTAT.

Neni 19

Ndalimi për mbledhjen e të dhënave të ngjashme

1. Gjatë një periudhe kohore prej 6 javësh para kryerjes së regjistrimit dhe gjatë muajit të mbledhjes së të dhënave të regjistrimit është e ndaluar për të gjithë individët dhe organizatat të mbledhin të dhëna brenda territorit të Republikës.

2. Në përputhje me legjislacionin në fuqi, të gjithë subjektet të cilat gjatë periudhës së përmendur më lart kanë ndërmend të grumbullojnë të dhëna për individë dhe banesa ose lidhur me aktivitete tregtare e private, duhet të kërkojnë një autorizim të veçantë pranë Komisionit Qëndror të Regjistrimit.

KREU IV

KUNDRAVAJTJET ADMINISTRATIVE

Neni 20

Kundravajtjet

1. Çdo shkelje e rregullave të parashikuara në nenin 4 dhe 9, përbën kundravajtje administrative dhe dënohet me gjobë nga 10000 deri në 20000 lekë.

2. Çdo shkelje e rregullave të parashikuara në nenin 19, përbën kundravajtje administrative dhe dënohet me gjobë nga 15000 deri në 20000 lekë.

Neni 21

Dënimet me gjobë për shkeljet administrative të parashikuara në nenin 20 jepen nga Kryetari i Komisionet e Regjistrimit në prefekturë. Ankimi kundër këtij dënimi bëhet pranë Komisionit Qëndror të Regjistrimit brenda 10 ditëve nga shpallja e vendimit. Kundër vendimit të Komisionit Qëndror të Regjistrimit mund të bëhet ankim në Gjykatë brenda 10 ditëve

Proçedurat për vënien dhe vjeljen e gjobave rregullohen me ligjin nr. 7697 datë 07.04.1993 “ Për kundravajtjet administrative”.

KREU V

DISPOZITA PERFUNDIMTARE

Neni 22

Ngarkohet Këshilli i Ministrave që brenda dy muajve nga hyrja në fuqi e këtij ligji, të nxjerrë aktet nënligjore në përputhje me parimet e përgjithëshme të parashikuara në nenet 13, 14, 15,16, 17, 18, 19 të këtij ligji.

Neni 23

Të dhënat e Regjistrimit të Popullsisë të mars-prillit 2001 nuk do të përdoren për hartimin e listave zgjedhore për zgjedhjet parlamentare te vitit 2001.

Neni 24

Ky ligj hyn në fuqi 15 ditë pas botimit të tij në Fletoren Zyrtare.

KRYETARI I KUVENDIT

SKËNDER GJINUSHI

Botuar ne fletoren zyrtare nr. 36/2000 date 15.11.2000.